Jump’éel k’iine’ juntúul ko’olel k’oja’an ti’ paale’ bin si’ tu juunal.
Táan u meeyaje’ ka’ tu yúubaj nuka’aj síijil u chichnil, ka’ chilaaj tu k’ab junkúul che’.
U k’ab tuun le che’o’ tu lóochaj le ko’olelo’. Na’ tsiile’ tu meentaj jump’éel k’u’ yéetel u le’ le che’o’ utia’al u chikunsik u chichan paal ken síijik.

Ka’ ts’o’ok u síijil paale’, ko’olele’ ki’ jweenij. Chan paale’ jop’ u yóok’ol tumen wi’ij, xch’up che’e’ ka tu yilaj beyo’ tu tséentaj yéetel u yiits.

Ka’ aaj maama tsiile’, ja’ak’ yóol ka’ tu yilaj u chan paale’ ts’o’ok u suut che’il: che’ u  k’abo’ob, che’ u yooko’ob, che’ u yich… ka tu tukultaje’: --Ma’ ten in bis tin wotochi’. Je’el u jats’iken in wíichame’.  Yaan in wa’alik ti’e’ ka’ sije’ kíimeen, Ka’ súunaj tu juun  tak kaaj.

Séeb nojochchajik paal, ka jop’ u máan u xíimbaltik le k’áax tu’ux kaja’ano’. Jump’éel k’iine’ tu yilaj ya’ab che’ob xot’a’antako’ob; le je’ela’ jach naak’ti’ ka’ tu
ya’alaj: --¡Bejla’e’ ten ken kanantik in láak’o’ob!

Bey tuno’ le ken u yiil tu náats’al jxootche’ob, ku téek e’esikubaj ti’ob, le jxootche’obo’ ken u yilo’ob wíinik che’e’, ku ja’ak’al u yóolo’ob ku púuts’ulo’ob.
Bey túun úuchik u seen jats’utstal k’áax.

U kúulul che’obe’ tu jach yaakuntajo’ob wíinik che’, tu ya’alajo’ob ti’e’: --¡bejlae’ teech u ts’úulil le k’áaxa!